Un pensiero su “Luigi Maria Corsanico legge Eduardo De Filippo. 3”

1. Luigi Maria Corsanico 12/12/2024 alle 06:19

   Eduardo de Filippo – Ca si fosse…

   Eduardo de Filippo ‘O CANISTO
   Edizioni Teatro San Ferdinando 1971

   Lettura di Luigi Maria Corsanico

   ______________________________

   Ca si fosse… (1959)

   Sta tutto scritto
   sta tutto signato.
   Chi pe’ na mano
   chi pe’ n’ata mano…
   Chello pe’ cchesto
   e chesto pe’ chell’ato…
   Sta tutto scritto
   sta tutto signato.
   Ma addò sta scritto?
   Addò vene signata
   na sorta trista
   ca te nchiova ncroce?
   E chi è stu nfamo,
   st’anema dannata
   ca segna e scrive
   dint’a chistu libro
   e ca dice:
   «Mò tu!»,
   «Tu no!»,
   «Tu sì!»?
   Nun se trova na pagina caduta,
   vulata all’intrasatta
   ‘a dint’ ‘o libro:
   nu fuglietto,
   n’appunto…
   nun se trova nè pe’ ll’aria
   nè nterra.
   Ca si fosse…
   ca na pagina sola se truvasse,
   cu n’appunto signato,
   na parola,
   se putesse
   cu certezza sape’
   qual’è ‘a mano ca scrive,
   e se sapesse
   si scrive cu nu scopo
   na ragione
   o pe’ sfizio sultanto
   o sulamente pe’ malvagità…
   Addò sta scritta
   addò vene signata
   na sorta trista
   ca te nchiova ncroce?
   E addò se mette ‘a sciorta
   pe’ nun se fa’ vede’
   primmo d’ ‘o tiempo,
   primmo d’ ‘o juorno
   ll’ora
   e d’ ‘o mumento
   ca t’addà zumpà ncuollo
   a tradimento?
   Se mette dint’ a voce,
   mmiez’ ‘e pparole toie,
   sott’ ‘e penziere,
   se mmesca mmiez’ ‘e mmosse ca tu faie,
   dint’ ‘e resate ‘e quanno si’ felice…
   e quanno s’annasconne
   nun t’ ‘o dice.

   Rispondi ↓