L’anima nuatri ci l’avemu di tantu in tantu;
nuddu mai ci l’avi di cuntinu.
Li jorna e l’anni
ponnu passari comu nenti senza di idda.
A li voti
si ferma p’un pizzuddu
nna la carusanza;
autri voti ni veni a truvari di vulata
nna la vicchiania;
di raru ni duna na manu cu li camurri
tipu quannu sturnamu, quannu semu carrichi di valigi,
quannu caminamu cu li scarpi chi ni macirianu li pedi,
e si canzia propriu siddu avemu a capuliari la carni
o ni tocca jinchiri fogghi e fogghi di carti bullati.
Ntra milli discursi chi facemu
idda s’apprisenta forsi nna unu, e mancu sparti,
pirchì prifirisci lu silenziu
e giustu quannu la midudda ni scoppia
ni saluta e si la scoffa.
Pirchì ci abbutta.
E ci abbutta vidirini nna la fudda,
trippiari cumminannu ogni sorta d’affari,
trafichiari p’un vantaggiu qualegghè,
e siccomu lu preju e lu siddiu
nun sunnu pi idda sintimenti sparaggi
sta cu nuatri sulu quannu chissi dui su’ tutta na cosa.
Ci putemu fari cuntu
siddu capita chi nun semu sicuri di nenti
e curiusi di tuttu,
e ntra li cosi di stu munnu nesci foddi pi li ruloggi a pennulu
e li specchi, chi sgobbanu puru quannu nuddu li talia.
Nun dici di unni veni
né quannu vota tunnu e si ni va,
sutta sutta però spinna chi ci lu dumannamu.
Cuttuttu pari chi nuatri avemu bisognu di idda
comu idda di nuatri.

(versione in dialetto siciliano di
Marco Scalabrino)